Husik Domin Ukun Ita Fuan, Haroman Ita Nia Hanoin No Transforma Ita Nia Moris

Husik Domin Ukun Ita Fuan, Haroman Ita Nia Hanoin No Transforma Ita Nia Moris

Deskripsi :

Wainhira ema ida simu sakramentu ordem diákonu sira nian, nia simu Evanjelhu no hatán ‘Amen’ ba liafuan ne’ebé bispu dehan ba nia “simu bá Kristu nia Evanjelhu ne’ebé o iha knár atu haklaken, fiar iha buat nebe ó lé, hanorin buat ne’ebé ó fiar, no moris tuir buat ne’ebé ó hanorin”. Wainhira nia simu sakramentu ordem na’ilulik sira nian, nia mós hatan ‘Sim’ ba lia-husu husi bispu: ó hakarak ho dignu no matenek hala’o knár haklaken Evajenlhu no hanorin fiar katolika? Nuné, na’iluilik ida hatene didi’ak katak nia knár bót uluk liu mak atu haklaken Evanjelhu ba ema hotu-hotu (PO n 4).

Na’i Jesus husik hela ba nia Kreda Santa la’os de’it knár atu preserva fiar ne’ebé Kreda simu tiha ona, maibé mós atu haklaken, habelar, ba ema hotu no kriatura tomak. Ida ne’e mak liafuan ikus liu Na’i Jesus tatoli hela ba Apóstolu sira. Na’ilulik ida iha knár atu haklaken nu’udar profeta, no nia hatene katak nia prepara-aan iha estudu naruk, simu ordenasaun, ezatamente atu hala’o knár ida ne’e.

Importante lós atu kaer metin iha lala’ok knár ida ne’e prinsípiu “contemplata palies traterae”. Haklaken ba ema seluk buat ne’ebé ha’u rasik kontempla uluk tiha ona. Knár haklaken na’ilulik ida nian mai husi nia luku kle’an mistériu ne’e rasik liu husi meditasaun no kontemplasaun pessoal ba Maromak nia Liafuan. Ida ne’e mós parte esensial iha knár haklaken ne’e. Só nia unidu lós ho Maromak nia Liafuan mak nia bele  ko’alia hodi Maromak nia naran. Dala barak ita haré na’ilulik ne’ebé la reza, nia homilia mesak liafuan ‘cliché’ (la orijinal no la interessante), mesak liafuan mamuk sem autoridade ne’ebé namkari iha anin. Orasaun pessoal no sásin moris santu mak halo na’ilulik nia liafuan iha autoridade no kbít atu atu toka ema seluk nia fuan. Evanjelhu ne’ebé Kreda haklaken, la’os de’it mensajen ida, nia ne’e esperiensia ida ne’ebé divinu no ‘vivificante’ ka fo moris (life-giving). Na’ilulik sei kontempla uluk, katak sai ida de’it ho Maromak, nune’e de’it nia bele lori duni grasa rua nebe importante liu: konversaun no santifikasaun ba nia aan rasik no ba ema seluk.

Santa Kreda selebra nia fiar iha tinan tomak nia laran. Ba ida ne’e, Santa Kreda prepara ba ita tinan litúrjiku no konvida ita atu selebra mistériu sira Na’i Jesus nia vida iha tinan tomak nia laran. Nune’e tinan litúrjiku ne’e tempu ba ita atu la’o tuir mistériu sira Na’i Jesus nian, hodi medita tuir nia mistériu sira. Loro-loron ita medita Evanjelhu, atu ita bele hetan grasa triplu nu’udar St. Inácio de Loyola haruka ita husu: konhese Jesus klaru liu tan, atu nune’e bele hadomi Nia kle’an liu tan, no bele la’o tuir Nia besik liu tan.

Meditasaun sira nebé P. Luis Pereira halo ona ne’e hatudu mai ita aspetu bót rua ne’e: knár na’ilulik nian no essensia tinan litúrjiku nian ba ita leitor sira hotu. Hau fiar katak P. Luis halo ida ne’e uluk nana’in atu hakle’an nia fiar rasik, ezerse nia knár tuir promesa nia halo iha sakramentu ordem na’ilulik nian, no hakarak tulun ema se de’it ne’ebé loke-aan atu simu grasa wainhira le reflesaun sira ne’e. Ha’u konvida ita hotu atu bele aproveita didi’ak reflesaun sira ne’e hodi bele simu triplu grasa ne’ebé ita hotu husu ba ita nia aan: konhese Jesus klaru liu tan, hadomi Nia kle’an liu tan, no la’o tuir Nia besik liutan.

Informasi Buku :

Penulis : Luis Pareira, SJ

Bahasa : Timor Leste

Penerbit : Penerbit Cleon

ISBN: –

Ukuran Buku : 13 x 19 cm

Halaman : 144 hal